Муса  Жалил

Йўллар

Йўллар,   мени  она  юртимдан,

Жудо  этиб,  қийнаб  нетдингиз?

Етар  энди  шунча  юрганим,

Мени  тезда  уйга  элтингиз.

Кўп  соғиндим  таниш  қирларни,

Ўрмонларни,  кўприк   бошимни.

Мени  кутиб  соғиниб  кетган,

Ингичка  бел, қора  қошимни.

Кун  ёмғирли  эди  мен  кетганда,

Қараб  қолган эди  сирдошим.

Намлагандир  унинг  кипригин,

Ёмғир каби  нозли  кўз  ёши.

Йўллар,  йўллар,  сиз  қийнадингиз,

Мени  шундай  қаттиқ,  беаёв.

Айтинг,   сиздан  яна  ким   юрган,

Мендек  ёлғиз,  ғамгин  ва  яёв?

Менга  ўхшаб  қай  шошқин  юрак,

Юрди  сиздан  боқиб  чироққа?

Кимни  мендай  маюс  дард  билан,

Ташладингиз  элтиб  йироққа?

Узоқларга  кетсакда  бизлар,

Умид,  ишонч   дилнинг  овунчи.

Тарк  этмайди  умидвор  дилни,

Туғилган  юрт - Ватан  соғинчи.

Йўллар,  мени  она  юртимдан,

Жудо  этиб,  қийнаб  нетдингиз?

Етар  энди  шунча  юрганим,

Мени  тезда  уйга  элтингиз!

Холдор  Вулқон  таржималари.